Ministria e Drejtësisë reagoi për grevën e urisë të organizuar në burgje nga të burgosurit. Ministria ka nisur një hetim për të verifikuar faktorët që kanë nxitur të dënuarit të organizohen në protestë. Sipas saj, kjo situatë u inicua nga të burgosur që ndodhen në regjimin 41bis.
“Shërbimi i Kontrollit të Brendshëm të Burgjeve dhe Drejtoria e Përgjithshme e Burgjeve në bashkepunim me agjensitë e specializuara të shtetit kanë filluar hetimin për të gjithë elementët dhe faktorët e brendshëm apo të jashtëm që kanë synuar provokimin dhe nxitjen e kësaj situate me qëllim destabilizimin e sigurisë në burgje. Ministrja e Drejtësise ka urdhëruar ngritjen e një grupi pune që do të shohë me kujdes të veçantë problematikat e konstatuara për çështjet e sigurisë dhe respektimin e të drejtave të të dënuarve në respekt të kuadrit ligjor në fuqi përfshi dhe ndryshimet e përmirësimet e nevojshme në strukturat drejtuese të sistemit të burgjeve. Shkaku kryesor i fillimit të saj është inicuar nga subjekte të Regjimit 41bis pavarësisht përhapjes së saj edhe në grup të dënuarish të tjerë në disa institucione të tjera”, thuhet në reagimin e Ministrisë së Drejtësisë.
Në burgun e Peqinit nisi greva e urisë një ditë më parë, e cila u shtri edhe në institucione të tjera të vuajtjes së dënimit. Të burgosurit kërkuan heqjen e dënimit me burgim të përjetshëm, uljen e dënimeve dhe amnisti.
