Gjykata e Lezhës liroi tre punonjës të burgut të Shënkollit, të cilët u arrestuan pas arratisjes së 49-vjeçarit Daut Laze.
Gjin Ndoka, Mark Nikolli dhe Zhaneta Mella, u njohën me masat e sigurisë në gjykatën e Lezhës. Sipas burimeve, gjatë seancës gjyqësore të zhvilluar me dyer të mbyllura, ata deklaruan se kishin qenë në detyrë, por nuk e kishin konstatuar arratisjen e 49-vjeçarit nga burgu. Pasi dëgjoi palët, gjyqtari Lirim Bulica pranoi kërkesën e prokurorit Françesk Ganaj, duke e cilësuar të ligjshëm arrestimin e tre punonjësve të burgut dhe vendosi ndaj tyre masat e sigurisë: “Arrest në Shtëpi” për Gjin Ndokën, punonjës shërbimi në kupolë, dhe Mark Nikollin, punonjës në sektorin e grupit të sigurisë, ndërsa Zhaneta Mellës, operatore kamerash, iu vendos masa e sigurisë “Detyrim Paraqitje”. Ndaj tyre është ngritur akuza për shpërdorim detyre dhe hetimet për këtë çështje po vijojnë nga Prokuroria e Lezhës.
Daut Laze u arratis nga burgu i Shënkollit në Lezhë mbrëmjen e 3 shkurtit, dhe pavarësisht kontrolleve, policia ende nuk ka arritur ta gjejë. Nga veprimet e kryera, rezulton se 49-vjeçari, i cili ka probleme të shëndetit mendor, ka dalë në ajrim, ka marrë një llamarinë dhe e ka mbështetur te muri mbi 4 metra të lartë në anën jugore të burgut, duke e kapërcyer dhe larguar. Daut Laze ishte dënuar me mjekim të detyruar, dhe arratisjen e realizoi nga dhoma e mjekimeve në institucionin e shndërruar prej më shumë se dy vitesh në strehën e përkohshme për të burgosurit me probleme të shëndetit mendor, ku aktualisht ndodhen 470 persona dhe një staf prej 180 punonjësish.
