Mediat britanike vijojnë raportimet për rastin e 23-vjeçares Mia O’Brien nga Huyton, e cila u dënua me burgim të përjetshëm në Dubai pasi në banesën e saj u gjetën 50 gramë kokainë. Studentja e drejtësisë në University of Liverpool u shpall fajtore për posedim dhe trafikim droge, duke marrë gjithashtu një gjobë prej 100 mijë paundësh. Sipas autoriteteve, ajo do të vuajë të paktën 25 vite burg.
Arrestimi i saj u bë në tetor të vitit të kaluar, ndërsa bashkë me të u ndaluan edhe një shoqe dhe partneri i saj, të akuzuar po ashtu për trafikim. Gjyqi zgjati vetëm një ditë dhe u zhvillua në gjuhën arabe, me të renë që u informua për vendimin përmes avokatit. Në mbrojtjen e saj, ajo ka mohuar që të kishte qëllim shpërndarjen e lëndës narkotike.
E reja po mbahet në burgun famëkeq Al-Awir Prison, ku sipas nënës së saj, Danielle McKenna, përjeton kushte tepër të vështira. Ajo ndan qelinë me gjashtë gra të tjera dhe fle në dysheme. Nëna e saj e përshkroi situatën si “një ferr të gjallë”, duke shtuar se vajza e saj është e frikësuar dhe e dëshpëruar.
Familja shpreson të apelojë vendimin dhe të sigurojë transferimin e saj në Mbretërinë e Bashkuar për të vuajtur dënimin më pranë familjes. Një fushatë në platformën GoFundMe për të mbledhur fonde u mbyll për shkak të shkeljes së rregullave të përdorimit, pasi synonte mbështetje për çështje ligjore që lidhen me krime të caktuara.
Ndërkohë, ish-të burgosur dhe organizata si Human Rights Watch kanë publikuar më herët raporte me akuza për abuzime serioze në burgun Al-Awir, përfshirë dhunë, keqtrajtim dhe mungesë trajtimi mjekësor. Autoritetet në Dubai i kanë mohuar vazhdimisht këto pretendime.
/vizionplus.tv
