Kreu aktual i Partisë Demokratike, Lulzim Basha mohon zërat se ka futur vetë kandidatë në garën për kryetar, me qëllim që të promovohen në poste të caktuara.
Nga Pogradeci, Basha i quajti këto thashetheme që po krijojnë konfuzion. Sipas tij, në garën për kryetar, të gjithë janë të barabartë.
“Duke qenë se ka zëra që qarkullojnë se ka kandidatë në garë që u është kërkuar kandidimi nga unë, në mënyrë që të promovoheshin në poste të ndryshme në parti, kjo është absolutisht e pavërtetë. Në këtë garë, të gjithë janë të barabartë dhe do të jetë vota e anëtarësisë që do të vendosë, siç ndodh për pozitat e tjera drejtuese në parti. Këto thashetheme, pavarësisht nga kush janë përhapur, thjesht kanë për qëllim të krijojnë konfuzion ose ndonjë avantazh të pandershëm në këtë garë.”
