Një fanse nga Shtetet e Bashkuara të Amerikës ka ngritur pretendime të rënda ndaj Meghan Markle dhe Netflix, pasi thotë se është djegur rëndë nga një receta e kripës së banjës që është shpërndarë në serialin “With Love, Meghan”.
Është fjala për Robin Patrick, nga Maryland, e cila deklaron se pas përdorimit të përzierjes me kripëra Epsom dhe Himalaje, vaj arnika dhe vaj livandoje, ka pësuar djegie, plagë të hapura dhe dhimbje të forta, rapoton The Sun.
Receta në fjalë u paraqit në episodin e parë të emisionit, ku Meghan e përgatiti si dhuratë relaksuese për një mik të saj. Por për Patrick, përdorimi i kësaj recete shkaktoi të djegura dhe dhimbje.
Ajo tani kërcënon me një padi prej 10 milionë dollarësh ndaj Dukeshës së Sussex-it, Netflix dhe kompanisë së produksionit “Archewell”. Sipas saj, receta u shpërnda pa asnjë paralajmërim për efektet anësore, gjë që përbën “neglizhencë të rrezikshme”
Avokati i Meghan Markle, Cameron Stracher, i ka hedhur poshtë akuzat, duke theksuar se përdorimi i këtyre përbërësve kërkon kujdes për njerëzit me sëmundje kronike, dhe se kjo është e qartë edhe në etiketat e produkteve.
Ngjarja ka nxitur polemika në rrjet mbi ndikimin e personazheve publikë dhe përgjegjësinë e tyre ndaj ndjekësve kur ndajnë receta apo këshilla që lidhen me shëndetin.
