Do t’i nënshtrohet ndërhyrjes në mushkëri për heqjen e tumorit, Papa Leone mbërrin në spitalin Gemelli të Romës

Papa Leo XIV ka mbërritur në spitalin Gemelli të Romës, ku do t’i nënshtrohet një ndërhyrjeje kirurgjikale për heqjen e një nyjeje në mushkëri.

Ai u largua nga Vatikani rreth orës 13:00 dhe, pas mbërritjes në spital, përshëndeti besimtarët dhe qytetarët që e pritën jashtë godinës.

Sipas zyrës së shtypit të Vatikanit, operacioni do të kryhet gjatë pasdites nga ekipi i kirurgjisë torakale, i drejtuar nga profesori Stefano Margaritora.

Informacionet e mëtejshme mbi gjendjen shëndetësore të Papës pritet të bëhen publike gjatë mbrëmjes.

Sekretari i Shtetit të Vatikanit, kardinali Pietro Parolin, deklaroi se e kishte takuar Papën një natë më parë dhe e kishte parë të qetë.

Ai shprehu shpresën që problemi shëndetësor të zgjidhet sa më shpejt, duke theksuar se Papa po shoqërohet me lutjet e besimtarëve.

Ndërkohë, sipas gazetës Il Messaggero, autoritetet kanë përgatitur një plan të posaçëm sigurie për qëndrimin e tij në spital, me kontrolle të rrepta të hyrjeve dhe daljeve.

Masat përfshijnë gjithashtu mbikëqyrjen e perimetrit të spitalit, mbrojtjen e sistemeve informatike dhe masa për garantimin e privatësisë së të dhënave mjekësore të Papës.

Lajmi ka ngjallur shqetësim mes besimtarëve, ndërsa mediat kanë vënë në dukje mungesën e mesazheve publike të solidaritetit nga presidenti amerikan Donald Trump dhe zyrtarë të tjerë të lartë të SHBA-së.

Ndërsa priten rezultatet e ndërhyrjes kirurgjikale, vëmendja mbetet te gjendja shëndetësore e Papa Leo XIV dhe njoftimet zyrtare të Vatikanit.