Vajza e bashkëshortes së kryeministrit Edi Rama, Rea Xhillari ka kallëzuar ditën e djeshme për shpifje në Gjykatën e Tiranës ish kryeministrin Sali Berisha dhe 6 deputetë të tjerë demokratë. Më konkretisht, të paditur janë Luan Baçi, Flamur Noka, Tritan Shehu, Albana Vokshi, Edi Paloka dhe Edmond Spaho.
Por detaje të reja janë zbardhur nga aktpadia e Xhillarit, emri i të cilës është përmendur nga Berisha dhe deputetët e tij si përfituese e tenderave publikë.
Lexo edhe :
Related Posts
Duke i konsideruar këto deklarata si shpifje, Rea Xhillari kërkon dëmshpërblim me vlerën 35 milionë lekë të vjetra për dëmin që i kanë shkaktuar.
Ajo shpjegon se përse tani e ndërmerr këtë hap duke i adresuar shpifjet në gjykatë, pas akuzave që janë drejtuar ndaj saj gjatë 8 viteve të fundit.
“Në këto 8 vite, kam gjykuar që shpifjet publike ndaj meje, të konsumuara nga ana e përgojuesit tim në terrenin politik e publik, nuk meritojnë përfshirjen time. Kjo sepse së pari, nuk kam zgjedhur politikën si fushë të interesit tim dhe nuk jam jo vetëm faktor i drejtëpërdrejtë, po as i tërthortë i debatit politik. Së dyti, sepse Sali Berisha është shpallur “shpifës” me vendim gjykate në shumë raste dhe më është dukur sikur durimi ishte më i arsyeshëm se sa denoncimi i një personazhi që shpifjen e ka natyrë të dytë. Së fundi, sepse ky personazh nuk ka pushuar së shënjestruari, godituri dhe përbalturi nënën time, Linda Ramën, nga momenti që ajo zgjodhi të ishte bashkëshorte e Edi Ramës. Linda, nëna ime, është shembulli im i qytetarisë dhe profesionalizmit, modeli i përkushtimit familjar dhe dinjitetit publik”, thuhet në padinë e Rea Xhillarit.
Demokratët e akuzojnë vajzën e Linda Ramës se ka përfituar tendera publikë nëpërmjet subjektit tregtar “51N4E”, një studio arkitekture me qendër në Bruksel dhe sipas tyre Xhillari ka qenë pjesë e stafit dhe bashkëpunëtore për shumë vite e kësaj kompanie. Po ashtu, sipas opozitës ka përfituar tendera nëpërmjet subjektit tregtar “I RI” sh.p.k., bashkëthemeluar nga G*** A*****. Por të gjitha këto deklarata janë të rreme sipas Xhillarit, teksa shton se deklarata të tilla janë një ndërhyrje kriminale në jetën e saj dhe i shërbejnë qëllimit të denigrimit pa asnjë provë të figurës së saj personale.
Xhillari thekson në akt padi se në shtator 2011, kur kompania që ajo akuzohet ka pranuar kërkesën e saj për praktikën mësimore, Edi Rama në atë moment nuk mbante asnjë funksion zyrtar ndërsa ajo ishte thjesht një studente. Më tej, ajo nënvizon se marrëdhëniet kontraktuale me studion e projektimit 51N4E janë mbyllur plotësisht në vitin 2012.
“Për të kryer Praktikën time Mësimore (apo Stazhin), kam aplikuar në studion e projektimit 51N4E në Belgjikë. Aplikimit tim për t’u pranuar si studente praktikante për një periudhë 9 mujore, kjo studio i është përgjigjur pozitivisht në Shtator të vitit 2011 Nënvizoj se Edi Rama në atë moment nuk mbante asnjë funksion zyrtar ndërsa unë isha thjesht një studente”, thuhet në akt padinë e Rea Xhillarit.
Padia në Gjykatën e Tiranës është dorëzuar nga përfaqësuesi i saj ligjor./vizionplus.tv
