Deputeti i Partisë Demokratike, Dashnor Sula, teksa fliste në Kuvend për buxhetin 2022, u shpreh se vendi është ndarë në dy shtresa, në shumë të pasur dhe shumë të varfër.
Gjatë fjalës së tij, ai tha se ka ministra që blejnë mbi 13 mijë euro një xhup.
“Kjo është seanca e fundit të këtij sesioni dhe normalisht duhet bërë një bilanc se çfarë produkti kemi nxjerrë deri tani. Problemi më i madh këtu është që nuk dëgjojnë për të kuptuar, por dëgjojnë për tu përgjigjur. Pavarësisht se ne do japim argumente për buxhetin që ju të kishit mundësi për të reflektuar, ju dëgjoni vetëm për t’u përgjigjur. Ne në Shqipëri kemi dy kategori, një të pasur dhe një shumë të varfër. Do t’ju tregoj për paradën e rrobave që veshin ministrat në rrugët e Tiranës. Një ministër i kësaj qeverie që ka shkuar te një dyqan në Bllok, kur e ka pyetur shitësin për një xhup i ka thënë kushton 5 mijë euro. Ministri e ka pyetur a ka xhup më të shtrenjtë. Pastaj ka blerë xhupin 13.200 euro. Ta kontrollojë qeveria kush del pasditeve me këtë xhup”, u shpreh deputeti demokrat.
