Çmim për sezonin fantastik, Strakosha shpallet më i miri në Greqi
Thomas Strakosha ka marrë një tjetër vlerësim për paraqitjet e tij në futbollin grek. Gardiani i Kombëtares shqiptare është zgjedhur portieri më i mirë i sezonit 2025/26 në një votim të zhvilluar nga komuniteti i Transfermarkt për kampionatin grek.
Portieri 31-vjeçar ka marrë 39.5% të votave, duke lënë pas Konstantinos Tzolakis të Olympiacosit, i cili siguroi 36.4%. Ky vlerësim vjen pas një sezoni pozitiv për Strakoshën, i cili ishte një nga lojtarët e rëndësishëm të AEK-ut në rrugën drejt titullit kampion në Greqi.
Skuadra e Athinës zhvilloi një sezon të shkëlqyer nën drejtimin e trajnerit Marko Nikolic, duke siguruar titullin e 14-të kampion në historinë e klubit. Edhe tekniku serb u vlerësua nga mediat sportive greke, të cilat e përzgjodhën si trajnerin më të mirë të sezonit.
Megjithatë, aktualisht Strakosha po kalon një periudhë të vështirë për shkak të një dëmtimi në dorë, të pësuar në ndeshjen ndaj Arisit më 5 shtator. Ai ka munguar në ndeshjet e fundit të AEK-ut dhe, sipas deklaratave të Nikolic më 24 tetor, pritet të rikthehet në gjendje të plotë pas ndërprerjes së kampionatit për ndeshjet e kombëtareve.
Sipas statistikave të sezonit aktual, Strakosha ka regjistruar gjashtë aktivizime në të gjitha kompeticionet me AEK-un. Rikthimi i tij në fushë pritet me interes edhe nga Kombëtarja shqiptare, ku gardiani mbetet një nga emrat kryesorë të repartit të portës.
