Chiellini: Jam i shëmtuar por fama nga futbolli më ndihmoi të shkoja me shumë femra

Ish-kapiteni i Italisë bëri një rrëfim të pazakontë për jetën private, duke pranuar me humor se fama dhe suksesi në futboll i kishin dhënë më shumë mundësi edhe jashtë fushës.

Giorgio Chiellini ka qenë gjithmonë një nga futbollistët që nuk e kanë pasur problem të bëjnë shaka me veten.

Ish-mbrojtësi i Juventusit dhe i kombëtares italiane ka tërhequr vëmendjen edhe me një rrëfim të sinqertë për pamjen e tij fizike dhe ndikimin që karriera sportive ka pasur në jetën sentimentale.

Në një intervistë për podcastin “Team Serie A”, të transmetuar nga media gjermane “Bild”, Chiellini pranoi hapur se nuk e konsideronte veten ndër futbollistët më të pashëm të brezit të tij.

Por, me humorin që e karakterizon, ai shtoi se të qenit një futbollist i suksesshëm e kishte ndihmuar të kishte më shumë marrëdhënie me femrat sesa do të kishte pasur nëse do të ushtronte një profesion tjetër.

Përtej batutave, Chiellini ndërtoi një karrierë të jashtëzakonshme, duke u kthyer në një nga mbrojtësit më të njohur të futbollit italian. Ai regjistroi 117 ndeshje me kombëtaren e Italisë dhe ishte një nga protagonistët e triumfit në Kampionatin Evropian të vitit 2021.

Në jetën private, ish-futbollisti është i martuar me Carolina Bonistalli që prej vitit 2014. Historia e tij tregon se pas famës, trofeve dhe vëmendjes mediatike, ekziston edhe një njeri që nuk e merr veten tepër seriozisht dhe di të qeshë me dobësitë e veta.