Kreu i partisë “Republikanët”, Bruno Retailleau, pritet të shpallë zyrtarisht sot kandidaturën e tij për zgjedhjet presidenciale të vitit 2027 në Francë. Lajmin e ka bërë të ditur vetë ai përmes një mesazhi drejtuar disa deputetëve të partisë së tij.
Ish-ministri i Brendshëm theksoi se vendimin e ka marrë “pas reflektimi të thellë”, duke vlerësuar se “ka ardhur koha që familja e tij politike t’u tregojë francezëve një rrugë të re”, të bazuar te rendi, mirëqenia dhe krenaria kombëtare franceze.
Retailleau, 65 vjeç, deputet me profil konservator, shërbeu si ministër i Brendshëm gjatë viteve 2024–2025, fillimisht në qeverinë e kryeministrit Michel Barnier dhe më pas nën François Bayrou. Ai u rikthye në detyrë kur Sébastien Lecornu mori postin e kryeministrit në tetor të kaluar, por dha dorëheqjen pak kohë më vonë, duke shprehur mospajtim me disa nga vendimet e kreut të qeverisë.
Sondazhet aktuale tregojnë se Retailleau e ka të vështirë të arrijë në raundin e dytë të zgjedhjeve presidenciale. Edhe pse ka ndjekur një linjë të ashpër ndaj emigracionit dhe ka theksuar rritjen e dëbimeve si dhe luftën kundër krimit të lidhur me trafikun e drogës gjatë kohës në Ministrinë e Brendshme, ai pritet të përballet me konkurrencën e fortë të Marine Le Pen dhe Jordan Bardella, të cilët renditen lart në sondazhe.
Pas largimit nga qeveria, Retailleau ka kritikuar ashpër ekzekutivin, veçanërisht për lëshimet që, sipas tij, kryeministri Lecornu ka bërë ndaj Partisë Socialiste për të siguruar miratimin e buxhetit të vitit 2026 pa rrëzuar qeverinë.
Retailleau pritet të bëjë një deklaratë në rrjetet sociale më vonë gjatë mbrëmjes dhe më pas të japë një intervistë për edicionin informativ të kanalit televiziv TF1.
