Operacioni “Forca e Ligjit” ka zbritur këtë të premte në Berat. Dy të dënuar për trafik droge duhet të vetëdeklarojnë burimin e pasurisë që kanë ngritur.
Kjo strukturë iu ka dërguar formularët e posaçëm: Ervis dhe Leonat Gavellit. Të dy këta shtetas janë dënuar për veprën penale “Trafikim i lëndëve narkotike”.
Në 2015-ën, kur ishte 42 vjeç, Leonat Gavelli u mor peng nga persona të armatosur tek Kodrat e Liqenit të thatë në Tiranë, por u la i lirë 8 orë më pas, pa asnjë lëndim nga autorët, të cilët qëllim kishin vetëm t’i jepnin një mesazh kërcënues. Vetë Gavelli para policisë tha se personat ishin bindur që kishin ngatërruar person dhe e kishin lënë të lirë
Leonat Gavelli është dënuar nga autoritetet italiane si drejtues në një rrjet të trafikut të kokainës nga Kolumbia dhe destinacion tregun e narkotikëve në Zvicër dhe Itali.
Një dosje për Gavellin dhe bashkëpunëtorët e tij shqiptarë ka ardhur në drejtim të Shqipërisë nga autoritetet italiane në vitin 2007, ku thuhej se kokaina sigurohej në Kolumbi nga Leonart Gavelli, dhe më tej ia dorëzonte vëllait dhe kushëririt në Itali.
Për shkak të sofistikimit që kishte ky rrjet i trafikut të drogës, autoritetet italiane mundën të kapin vetëm 3.5 kilogramë kokainë nëpërmjet përgjimeve, e trafikuar nga Kolumbia në Itali gjatë periudhës 2003-2004.
Ervis dhe Leonat Gavelli duhet të justifikojnë brenda 48 oresh që pasuria e tyre nuk është ngritur përmes ushtrimit të aktivitetit kriminal.
