Kryeministrat e vendeve të Ballkanit Perëndimor u mblodhën në Londër për të ri-përcaktuar përparësitë e tyre pas angazhimit të Bashkimit Evropian për të investuar 30 miliardë euro. Si thelbësore në samitin e radhës të Bankës Evropiane për Rindërtim dhe Zhvillim, kryeministri Edi Rama përmendi investimet në infrastrukturën hekurudhore, në energjinë e gjelbër dhe digjitalizim.
EDI RAMA
KRYEMINISTER I SHQIPERISE
Tashmë jemi në proces për të miratuar shumë shpejt në parlament një legjislacion mjaft revolucionar për start-up dhe nomadët digjitalë që do ta bëjë Shqipërinë vendin më të jashtëzakonshëm dhe liberal që nuk do të ketë rregullime për startup-et dhe nomadet digjital, jo vetëm në rajon, por në të gjithë botën e ndoshta në mbarë planetin.
Si domosdoshmëri për të thithur sa më shumë mbështetje nga paketa financiare që BE do të japë për gjashtë vendet e Ballkanit Perëndimor, Edi Rama veçoi turizmin, për të cilin tha se ndryshe nga të tjerët, Shqipëria, zotëron potencialin më të madh për ta shndërruar në një industri që gjeneron të ardhura të shumta.
EDI RAMA
KRYEMINISTER I SHQIPERISE
Për turizmin, mes të jashtëzakonshmëve ne jemi më të jashtëzakonshmit sepse jemi të bekuar me det, me mal, me lumenj, me liqene. Edhe pse tradicionalisht ne jemi mësuar të eksplorojmë vetëm bregdetin dhe ndryshe nga disa të tjerë, nuk kemi zhvilluar ende diçka serioze në aspektin malor, por ka nisur. Për shembull, në lumin Vjosa, lumi i fundit i egër në Europë, ne po bëjmë një plan transformimi, jo vetëm siç është sot, një zonë natyrore plotësisht e mbrojtur, por për ta bërë një park kombëtar. Është një hapësirë e jashtëzakonshme e ka një potencial të jashtëzakonshëm për të zhvilluar këtë lloj turizmi.
Paketa financiare prej 30 miliardë eurosh do të duhet të marrë edhe miratimin e Këshillit Evropian. Ajo është premtuar prej një viti dhe pritshmëritë janë që në muajt e ardhshëm ajo të nis e të shfrytëzohet nga vendet e Ballkanit Perëndimor me projekte të përbashkëta ose individuale, me vëmendjen kryesore te energjia e gjelbër, infrastruktura apo digjitalizimi.
