Kryetari i Partisë Demokratike, Sali Berisha, iu përgjigj kryeministrit Edi Rama pas akuzave të këtij të fundit ndaj gjyqtarëve të Gjykatës Kushtetuese për rastin “Balluku”. Sipas Ramës, një gjykatë nuk mund të pezullojë nga detyra një ministër, por Berisha pretendon të kundërtën.
“Edi Rama, në panik dhe i fantaksur, u zotua para jush në mënyrën më të papërgjegjshme se ai nuk do ta përfillë vendimin e Gjykatës Kushtetuese, pasi sipas tij, nuk ka ndodhur kurrë që një ministër të pezullohet nga gjykatat. Ky është një mashtrim i madh sa vetë Edi Rama. Në rajon, në Europë dhe në botë, gjykatat kanë pezulluar jo vetëm ministra, por edhe kryeministra. Por në këtë vendim të Gjykatës Kushtetuese, ai nuk sheh një goditje për Lubi Ballukun, por sheh potencialin dhe mundësinë e pezullimit të tij si kryehajduti i kombit nga gjykatat, pasi, siç e dini, Lubia ia ka bërë të qartë atij se do ta marrë me vete.”
Përmes një videomesazhi në rrjetet sociale, Berisha ftoi qytetarët të protestojnë të martën kundër qeverisë, për të kërkuar largimin e Ramës dhe Ballukut.
“Ditën e martë, secili prej jush proteston, shpreh revoltën në kryengritjen paqësore të opozitës, jo vetëm për vete, por për fëmijët e tij, për Shqipërinë dhe, si asnjëherë tjetër, për të ardhmen evropiane të këtij vendi. Ndaj ju ftoj të marrim fatet në dorë të Shqipërisë, t’i qëndrojmë ligjeve dhe Kushtetutës së vendit, si rruga e vetme e integrimit të Shqipërisë në BE, si rruga e vetme për rivendosjen e shtetit ligjor, ligjit dhe Kushtetutës në Shqipëri.”
Kryetari i Partisë Demokratike këmbëngul se Rama është thirrur nga BE për t’i komunikuar vendimin që është marrë, në rast se ai pengon sistemin e drejtësisë dhe veprimtarinë e tij.
/vizionplus.tv
