Deputeti demokrat, Luan Baçi, në një intervistë për Vizion Plus ka komentuar situatën e krijuar mes mazhorancës dhe opozitës, si dhe mënyrën si aksioni i kësaj të fundit do të vijojë përballë kundërshtarit.
Si e ka menduar opozita aksionin e saj në parlament?
“Sekretariati i turpit dhe jo Sekretariati i Etikës merr masë përsëri për 3 deputetë të opozitës. Në fakt nëse do të ishte për të marrë masë, duhet të merrte masë për 50 deputetë të opozitës që kanë qenë aty, sepse kanë qenë të gjithë bashkë në të gjithë veprimet që janë bërë aty”, tha ai. “Opozita thjesht kërkon zbatimin e rregullores, është mazhoranca ajo që po bën bllokimin dhe bllokimi bëhet nëpërmjet mohimit të së drejtave që i bëhet opozitës”, tha ai duke nënvizuar se vazhdimisht opozitës i janë mohuar kërkesa që i takojnë me ligj, kryesishtë për Komisionet Hetimor.
Si do ta vijoni aksionin tuaj opozitar, nëse siç diskutohet mbledhjet do të vijojnë virtualisht?
“Ne do të kërkojmë në mënyrë të vazhdueshme dhe të qëndrueshme që të plotësohen kërkesat legjitime tonat. Mazhoranca në shkelje të plotë të Kushtetutës do të vazhdojë të rri në kokfortësinë dhe këmbënguljen e saj absurde por të qëllimtë, që t’i anashkalojë këto kërkesa të opozitës dhe të gjejë rrugëdalje për të bërë atë që bëri ditën e enjte, duke bërë një seancë paçavure, duke mos i vituar ligjet por duke ngritur kartonë jeshilë dhe te kuq kot fare”, thekson ai duke shtuar se edhe në vazhdim opozita do të mbajë qëndrimin e saj kundrejt formalitetit të mazhorancës. “Po vërtetohet se kemi të bëjmë me një shtet policor, me një shtet autoritar, me një kryeministër që nuk zbaton më asnjë rregullore dhe asnjë ligj e që ka shkel të gjitha normat e demokracisë. Jemi në prag të vendosjes së një diktature dhe opozitës nuk i ngelet gjë tjetër veçse të vazhdojë të qëndrojë në institucion dhe t’iu bëj thirrje qytetarëve shqiptarë që të ngrihen të gjithë në këmbë”, tha ai.
Parlamenti pritet të votojë buxhetin për 2024, por opozita flet vetëm për sjelljen e mazhorancës, por nuk jepni një alternativë për një Shqipëri më të mirë nën drejtimin tuaj?
“Kjo është arsyeja që ne kërkojmë me insistim që të vendosim rregullin në parlament që amendimet tona, propozimet tona, ligjet që propozon opozita të bëhen publike dhe të jenë pjesë e diskutimeve, gjë që mazhoranca na e ka mohuar historikisht”, theksoi ai duke shtuar se 32 propozime të opozitës rrinë në sirtarë dhe nuk diskutohen.
Ai theksoi se ekspertë të fushave të ndryshme të PD do të parashtrojnë propozimet e tyre lidhur me shpërndarjen e buxhetit për vitin e ardhshëm.
