Kryeministri i Ukrainës Oleksiy Honcharuk ka paraqitur dorëheqjen.
Vendimin ai e mori pak ditë pasi u shfaq në një audio-regjistrim duke thënë se “Presidenti i vendit nuk di asgjë për ekonominë” .
Në një postim në Facebook, Oleksiy Honcharuk tha se ai i kishte dorëzuar postin Presidentit të vendit Volodymyr Zelenskiy.
“Unë e mora këtë post për të zbatuar programin e presidentit. Ai është një shembull i transparencës dhe vendosmërisë për mua,“ tha ai.
“Sidoqoftë, për të shpërndarë çdo dyshim për respektin dhe besimin tim për presidentin, unë kam shkruar një letër dorëheqjeje dhe ia kam dorëzuar presidentit,“ thuhet në deklaratën e Honcharuk.
Në fillim të kësaj jave, u bë publik një regjistrim audio në të cilin Honcharuk u shfaq teksa bënte komente poshtëruese lidhur njohjet e Presidentit Zelenskiy në fushën e ekonomisë.
Kryeministri e quajti Zelenskiy “një laik” në ekonomi dhe tha se presidenti duhet të jetë më i mirëedukuar në lidhje me monedhën kombëtare.
