Atentatorët kundër Ardian Çapjas dyshohet të kenë pesë. Mësohet se ata kanë lëvizur me një mjet tip “Volswagen” të vjedhur në Fushë-Krujë dhe pas të shtënave në drejtim të Çapjas, e kanë djegur mjetin.
55-vjeçari u qëllua me snajper dhe një plumb e kapi në shpatull. Por familjarët e Çapjas kanë gënjyer për ngjarjen. Ata kanë deklaruar në fillim në spitalin e Elbasanit se ai nuk është qëlluar, por është rrëzuar teksa kryente punime në shtëpi.
Në terren kanë zbritur edhe forcat RENEA, ndërsa po vëzhgohen edhe kamerat e sigurisë. Ky është atentati i tretë që i bëhet Ardian Çapjas.
Ardian Çapja është një emër i njohur në qytetin e Elbasanit, por edhe për drejtësinë, pasi ka qenë shoqëruar disa herë, ndërsa në vitin 2017 u ka shpëtuar dy atentateve me armë dhe eksploziv.
Ai është pronari i një hoteli në hyrje të qytetit të Elbasanit. Ardian Çapja është vëllai i Sokol Çapjes, që u ekzekutua në vitin 2005.
