Jorida Tabaku ka bërë një reagim të gjatë në rrjetet sociale në lidhje me draftligjin e amnistisë fiskale të hartuar nga qeveria.
Reagimin e saj Tabaku e titullon “Pabarazia si vizion i mazhorancës”.
Sipas Tabakut pabarazi të tilla e kanë shndërruar shqipërinë në parajsë pandershmërie.
Ajo shprehet se qeveria po përdor emigrantët si fasadë për të mbuluar qëllimet e saj të vërteta.
Reagimi i plotë:
Pabarazia si vizion i mazhorancës
Qeveria po pretendon se drafti i Amnistisë Fiskale është një projektligj në shërbim të emigratëve dhe shqiptarëve.
Pretendimi i anëtarëve të qeverisë është se me këtë draft nuk fitojnë amnisti të korruptuarit por emigrantët.
Sa të besueshëm janë ato? Pak, për të mos thënë aspak.
Fatkeqësisht emigrantët po përdoren si fasadë për të mbuluar qëllimin e vërtetë të qeverisë, legalizimin e parave të fituara pandershmërisht jo nga emigrantët por nga personat që kanë shkelur ligjet.
Pabarazi të tilla kanë shndërruar Shqipërinë në parajsën e pandershmërisë ndërsa e kanë shkretuar atë nga talenti dhe aftësia për të gjeneruar ide të reja në shërbim të kapitalit dhe ekonomisë.
Shqetësimi im është se shqiptari që punon për të prodhuar ide dhe risi teknologjike taksohet deri në 23% ndërsa ata që punojnë pandershmërisht taksohen 7% dhe amnistohen.
Shqetësimi i BE është edhe më i saktë, përderisa Shqipëria ka rrezik të kthehet jo vetëm parajsë e të dënuarve shqiptarë por edhe parajsa e të huajve që kërkojnë amnisti fiskale dhe penale.
Reagimi Komisionit Europian vetëm sa përforcon frikërat se ky projektligj do të amnistojë jo mundin e emigratëve por pandershmërinë.
Ne kemi nevojë për ide, risi dhe zhvillim të ekonoisë pasi ajo do të gjenerojë kapital dhe parà. Shqipëria ka nevojë për investime të forta dhe jo për ligje që promovojnë pandershmërinë dhe pabarazinë.
