Përfitues të projektit të paqes fiskale do të jetë ato biznese që kanë një xhiro mbi 14 milionë lekë në vit, pra praktikisht bëhet fjalë për bizneset e mëdha duke u përjashtuar sipërmarrjet e vogla. Paralelisht përjashtohen nga përfitimi bizneset në ndjekje penale.
Alban Zusi, sipërmarrës, thotë se një ligj i tillë nuk i vjen në ndihmë atij dhe biznesit që ai drejton.
“Unë nuk kam interes për një nisëm të tillë. Nuk më vjen në ndihmë, pasi nuk kam detyrime pa papaguara”, tha Zusi.
Por kush do të jenë përfituesit e vërtetë të kësaj nisme?
“Unë e shoh më shumë si një fshirje dhe pastrim të borxheve që nuk mblidhen dot më. Ne e dimë që shumë biznese kanë falimentuar, kanë kaluar në status pasiv dhe detyrimet që ato kanë lënë pas nuk mblidhen më. Ndaj këtë e shoh pozitive. Por shoh pozitive edhe faktin që shumë biznese duke qenë në vështirësi nuk kanë mundur të paguajnë detyrimet në kohë. Edhe këtij kontingjenti i duhet dhënë një mundësi”, tha Zusi gjatë një interviste për emisioni “E-ZONE”
Por a do të ketë biznese të mëdha që fitojnë tendera apo që kanë lidhje me politikën?
“I takon medias që nëpërmjet investigimeve të gjejë nëse do të ketë në këtë listë kompani apo peshkaqen të mëdhenj që do të përfitojnë. Duhet parë nëse dhe shumë klauzola hartohen në mënyrë të tillë që i vijnë në ndihmë disave prej këtyre peshkaqenëve. Pikëpyetja mbetet”, shtoi Zusi.
Paralelisht, Zusi është skeptik lidhur me efektin e këtij ligji në treg.
“Unë shoh që nuk ka një mekanizëm monitorues pas zbatimit në treg të kësaj nisme. Pra nëse qeveria thotë se do të formalizojë ekonominë, unë jam pak skeptik. Kush do ta garantojë një gjë të tillë? Ligji nuk e përcakton”, tha Zusi.
Ekspertë por dhe institucione financiare kanë shfaqur rezerva për një nismë të tillë, pasi cenon barazinë në treg dhe lë vend për të legalizuar para informale.
/vizionplus.tv
