Një 26-vjeçar ka rënë në prangat e Policisë së Vlorës, pasi ka thyer masën e sigurisë “arrest në shtëpi” dhe ka vijuar veprimtari të dyshuara kriminale, përfshirë përndjekjen dhe nxitjen e një të mituri për përdorim droge.
Specialistët për Hetimin e Krimeve në Komisariatin e Policisë Vlorë arrestuan në flagrancë shtetasin H. M., 26 vjeç, banues në Vlorë, i cili u konstatua jashtë banesës, në kundërshtim me vendimin e Gjykatës së Shkallës së Parë të Juridiksionit të Përgjithshëm Vlorë, që i kishte caktuar masën “arrest në shtëpi” për veprën penale “Përndjekja”.
Nga hetimet paraprake, rezulton se H. M. ka përndjekur një të mitur 12-vjeçar, si dhe dyshohet se e ka nxitur atë për përdorimin e substancave narkotike.
Shtetasi tashmë përballet me akuzat për tre vepra penale:
“Nxitja për përdorimin e drogës”;
“Largimi i të burgosurit nga vendi i qëndrimit”;
“Përndjekja”.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme ligjore.
Policia e Vlorës thekson angazhimin e saj në mbrojtjen e të miturve dhe goditjen e çdo forme të shkeljes së masave të sigurisë të vendosura nga organet gjyqësore.
