Kreu i Partisë Demokratike, Sali Berisha, mbrëmjen e sotme ka zhvilluar një takim me banorët e njësisë administrative 14, në Tiranë.
Berisha garantoi banorët e Astirit, se nëse PD vjen në pushtet më 11 maj, do të adresojë me urgjencë të gjitha problemet e krijuara sipas tij, nga qeveria Rama.
Berisha: Ju që mbrojtët vlerat qytetare, mbrojtët banesat tuaja, ju do të keni infrastrukturën më moderne arsimore, shëndetësore, rrugore dhe të gjithanshme. Të lësh një territor kaq të gjerë, një popullatë që shkon në 60-70 mijë banorë, do të thotë të urresh fëmijët, shkollimin e tyre, të ardhmen e tyre.
Berisha premtoi se do t’i adresojë problemet brenda 100 ditëve të para të qeverisjes. Ndërsa theksoi se arsimi do të jetë përparësi absolute.
Berisha: Garantoj çdo të sëmurë në këtë vend se nuk do t’u mungojnë kurrë ilaçet për shëndetin tuaj. Edhe sikur të mos kishim, përsëri them atë që thashë për rrugët, stolitë e grave do i shisnim që ju të mjekoheni. Garantoj të gjithë prindërit dhe fëmijët se arsimi do jetë përparësi absolute. Rrogë më të ulët se 1500 euro, mësuesit nuk do kenë. Shkollat do të njohin shkallën më të thellë të dixhitalizimit.
Berisha u ndal edhe te largimi i shqiptarëve. Ai tha se aryseja kryesore është varfëria dhe papunësia.
Berisha: Vetëm në 10 vite kanë ikur 600 mijë të rinj, 600 mijë krahë pune. Miqtë e mi, programi ynë është programi i ndryshimit të Shqipërisë. Programi me të cilin ne do vendosim minimumin jetik 200 euro. Çdo pensionist me pension nën 200 euro, dhe sot janë mbi 560 mijë pensionistë me pension nën 170 euro, çdo qytetar në ndihmë ekonomike, çdo prind me një fëmijë, çdo student me bursë, 100 ditët e para të qeverisjes tonë do kenë minimumin jetik 200 euro. Rroga minimale do jetë 500 euro. Rroga mesatare do jetë 1250 euro.
Berisha kërkoi votën e banorëve të Astirit dhe tha se më 11 maj duhet të votojnë ndryshimin./vizionplus.tv
