“San Nicolas” është vazhdimësia e projekteve të Concord Investment në zonën jugore të Shqipërisë, aty ku çdokush do të ketë mundësi të “takohet” me detin dhe malin.
Erjon Harizi, projekt menaxher i “San Nicolas” tha se vendndodhja e vilave që po ndërtohen është strategjike dhe e aksesueshme në pak minuta me disa nyje kryesore.
““San Nicolas” është në vazhdimësinë e disa projekteve që Concord Investment ka në zonën e jugut, duke filluar me San Pietron, me Orikumin, projekti i tretë është San Nicolas dhe vazhdon me 2-3 projekte të tjera shumë të mëdha në Sarandë. Është zgjedhur pikërisht kjo kodrinë e kësaj zone, pasi pamja këtu nuk ka limit. Është vetëm 2 km në dalje të tunelit të ri që po hapet në Llogara. Është 10-15 minuta larg portit të jahteve në Orikum si dhe 30 minuta larg nga aeroporti i Vlorës që po bëhet. Pra, për vendndodhje, këtu është vendndodhja më e mirë në këtë zonë, duke qenë ndërmjet zonës së Dhërmiut që është e njohur për të gjithë dhe zonës nga ana perëndimore e Palasës”, tha ai.
Harizi për emisionin Quo Vadis tha më tej se ndërtimet në kodër do të bëjnë të mundur që çdo vilë të ketë qasje me detin, ndërsa shton se projekti po zhvillohet mbi 150 mijë metra katrorë tokë.
“Ky është një ndërtim në kodër dhe secila vilë ka të njëjtën qasje detin. Kjo është një zonë ku deti takon qielli. Kjo është vetëm pjesa e parë e projektit ku është 150 mijë metra katrorë tokë, nga të cilat do të shfrytëzohet 56 mijë metra katrorë ndërtim, ku është e përbërë nga pjesa kryesore e hotelit ku është këtu para me rreth 7 mijë metra katrorë, pasohet nga vilat elitare dhe vazhdon me vilat premium dhe vilat dyshe. Pra ka vilë nga 450 metra deri në 150 metra. Cilido klient që vjen këtu e gjen veten më së miri në projektin tonë. Shumë rëndësi po u krijohet edhe zonave të shërbimit ku ka një parkim të madh, mund të parkohen mbi 400 automjete, ka një restorant, beach bar, pishinë publike për të gjithë banorët”.
Concord Investment që ka edhe statusin e investitorit strategjik, do të ketë nën menaxhim edhe pjesën e detit për 30 vite. Harizi tha se vilat do të kenë një fasadë me 60% xham, për të bërë të mundur pamjen nga deti dhe mali, e cila mund të shihet nga çdo ambient i vilës.
“Concord Investment, ashtu si në San Pietro ka statusin e investitorit strategjik, që do të thotë që bashkë me pjesën e hotelit ne kemi pjesën poshtë në bregdet e cila do jetë në administrimin tonë për së paku 30 vjet. Vilat janë konceptuar që, që në momentin e parë që hyn në shtëpi, kontakti me detin është i pashmangshëm. Si të rrish në sallon, qoftë edhe në guzhinë, edhe në çdo dhomë gjumi, pamja me detin dhe me natyrën këtu është nga të katërta anët. Mbi 60% e fasadës do jetë me xham. Qoftë të shikojmë malin e Llogarasë me dëborë apo të shohim detin, këtu pamja është e mrekullueshme nga të gjitha anët”.
