Kryedemokrati Sali Berisha u ka bërë thirrje demokratëve që të bashkohen në protestën e thirrur ditën e hënë para Kryeministrisë.
Në mbledhjen e Këshillit Kombëtar, Berisha tha se është koha që të ndryshohet orbitë dhe të kalohet në përballje totale me pushtetin.
“Thirrja ime është të spostohemi në një orbitë të re, dhe kjo orbitë është orbita e përballjes me këtë regjim. Është thirrje për çdonjërin prej nesh për guxim, për kreativitet, për të gjitha format e lëvizjes. Ju garantoj se në mënyrë të pashmangshme fitorja është e PD-së, është e shqiptarëve. Asgjë nuk do të na ndalë ne pa rikthyer Kushtetutën, ligjin, të drejtat e shqiptarëve për votën e lirë dhe ndëshkuar këtë organizatë kriminale, të papërmbajtur në vjedhjen e shqiptarëve”, tha Berisha.
Më tej, kryedemokrati u kërkoi anëtarëve të Këshillit Kombëtar dhe deputetëve që të punojnë me qytetarët për të pasur sa më shumë njerëz në protestë.
“Ju bëj thirrje anëtarëve të Këshillit Kombëtar të punojmë! Kush nuk vjen, lëre, puno me tjetrin. Është koha e guximtarëve”, theksoi Berisha.
