Një ligjvënës i lartë në Iran ka deklaruar se vendi i tij nuk do të heqë dorë në asnjë rrethanë nga kontrolli mbi Ngushticën e Hormuzit, një nga rrugët detare më të rëndësishme në botë për transportin e naftës dhe tregtinë ndërkombëtare.
“Kurrë. Është e drejtë e jona e patjetërsueshme,” u shpreh Ebrahim Azizi, ish-komandant i Gardës Revolucionare Islamike (IRGC) dhe aktualisht kryetar i Komitetit për Sigurinë Kombëtare dhe Politikën e Jashtme në parlamentin iranian, në një intervistë për BBC.
Sipas tij, Irani do të jetë ai që do të vendosë rregullat për kalimin nëpër këtë korridor jetik, duke përfshirë edhe dhënien e autorizimeve për anijet që kërkojnë të tranzitojnë zonën.
Azizi bëri të ditur gjithashtu se në parlament është në përgatitje një projektligj i ri, i mbështetur në nenin 110 të kushtetutës iraniane, i cili lidhet me çështje të mjedisit, sigurisë detare dhe sigurisë kombëtare. Ai theksoi se zbatimi i këtij ligji do t’i besohet forcave të armatosura.
Ngushtica e Hormuzit mbetet një pikë kyçe gjeostrategjike, përmes së cilës kalon një pjesë e konsiderueshme e eksporteve globale të naftës. Çdo tension në këtë zonë ka ndikim të menjëhershëm në tregjet ndërkombëtare të energjisë.
/vizionplus.tv
