Zyrtarët palestinezë: Bisedimet për armëpushim në Gaza në prag të dështimit

Negociatat midis Izraelit dhe Hamasit në Katar për një armëpushim të ri në Gaza dhe një marrëveshje për lirimin e pengjeve janë në prag të dështimit, sipas zyrtarëve palestinezë.

Një zyrtar i lartë i tha BBC-së se Izraeli kishte “fituar kohë” gjatë vizitës së kryeministrit Benjamin Netanyahu në Uashington këtë javë dhe e kishte bllokuar qëllimisht procesin duke dërguar një delegacion në Doha pa autoritet për të marrë vendime mbi pikat kryesore të marrëveshjes.

Megjithatë, përpara se të largohej nga SHBA të enjten, Netanyahu u shpreh optimist për arritjen e një marrëveshjeje “brenda pak ditësh”.

Ai tha se sipas marrëveshjes së propozuar, Hamasi do të lironte gjysmën e 20 pengjeve të gjallë që ende mban dhe pak më shumë se gjysmën e 30 pengjeve të vdekur gjatë një armëpushimi që do të zgjasë 60 ditë.

Që nga e diela e kaluar, negociatorët izraelitë dhe të Hamasit kanë marrë pjesë në tetë raunde bisedimesh indirekte në Doha.

Por të premten në mbrëmje, zyrtarët palestinezë të njohur me negociatat i thanë BBC-së se ato ishin në prag të dështimit, pasi të dyja palët janë thellësisht të ndara në disa çështje të diskutueshme.

Me bisedimet në një pikë kritike, pala palestineze po i bën thirrje SHBA-së të ndërhyjë më me forcë dhe të ushtrojë presion mbi Izraelin që të arrihet një marrëveshje.

Pa një ndërhyrje të tillë, paralajmërojnë ndërmjetësuesit, negociatat në Doha mund të dështojnë plotësisht./vizionplus.tv