Kryeministri italian Mario Draghi jep përfundimisht dorëheqjen. Kreu i qeverisë italiane e mori këtë vendim pas dështimit të mbrëmshëm në Senat për të siguruar një shumicë të re qeverisëse.

 

Draghi u përpoq të bashkonte partnerët e koalicionit në përpjekje për t’i dhënë fund krizës politike por që nuk ia arriti. Nga votimi në Senat, Draghi mori 95 vota pro dhe 38 kundër por braktisja nga Lega, Forza Italia dhe 5 Yjet bëri që kryeministri të ndalonte një raund të dytë votimi në Dhomën e Deputetëve duke theksuar se do të largohej pa kthim.

 

Sot Draghi i paraqiti zyrtarisht dorëheqjen presidentit Serxhio Matarela pas një takimi disa minutësh në pallatin presidencial. Më pas, u njoftua se presidenti Matarela kishte pranuar dorëheqjen e Draghit por se qeveria do të mbetet në detyrë për momentin.

 

Tani kreu i shtetit duhet të vendosë nëse do të shpërndajë dhomat e parlamentit, duke i hapur rrugën zgjedhjeve të parakohshme, apo do të mandatojë dikë tjetër për të formuar një shumicë të re qeverisëse nga parlamenti ekzistues.

 

Nëse Matarela vendos të shpërndajë kuvendin, atëherë Italia do të shkojë në zgjedhje të parakohshme. Zgjedhje këto që do të duhet të mbahen brenda 70 ditësh.

 

Kjo shihet në Itali si kriza politike më e rëndë e viteve të fundit gjë të cilën e nënvizoi dje vetë Draghi.

Në vjeshtë qeveria duhet të planifikojë buxhetin për vitin 2023, i cili zakonisht kërkon shumë kohë. Tjetër sfidë është edhe inflacioni, rritja e çmimeve si dhe lufta në Ukrainë.

Leave a Reply

Your email address will not be published.