Zv.ministrja e Brendshme Romina Kuko vijon takimet në SHBA, ku në qendër të bisedimeve janë projektet konkrete të Policimit në Komunitet. Gjatë kësaj vizite Kuko është takuar me Prokurorin e Përgjithshëm të Detroitit, z.Mattheë J.Schneider dhe me zëvendësin e tij, Hank Moon, ku ajo shprehu vlerësime për nivelin e shkëlqyer të bashkëpunimit mes vendeve në fushën e zbatimit të ligjit dhe luftën kundër krimit të organizuar, si dhe çështje me interes dypalësh.
Nga ana tjetër Prokurori Schneider tha se është informuar mbi përpjekjet e Shqipërisë në luftën kundër krimit të organizuar dhe është i impresionuar me rezultatet. Departamenti i Drejtësisë së SHBA ka dërguar një ekspert pranë Policisë shqiptare për të dhënë ndihmë dhe ekspertizë në fusha specifike. Zv.ministrja Kuko bëri një përmbledhje të strukturës, veprimtarisë dhe rezultateve të Task Forcës Speciale, që është ndërtuar për të luftuar krimin e organizuar, në kuadër të operacionit “Forca e Ligjit”
Gjithashtu zv.ministrja e Brendshme është takuar me Drejtorin e Policisë së Dearnborn në Detroit, Ronald Haddad, me të cilin ka diskutuar projekte konkrete dhe modele të Policimit në Komunitet, apo për oficerët e sigurisë në shkolla.
Projekti i Policimit në Komunitet në Dearborn është modeli më i suksesshëm në SHBA për shkak se në 5 vite uli kriminalitetin me 60% në një zonë heterogjene. Ndër të tjera në këtë takim u fol gjithashtu për disa modele të angazhimit në komunitetit, në nisma që kanë të bëjnë me sigurinë e qytetarëve.
