Një zjarr ka përfshirë tokat me bar dhe parcelat me grurë në fshatin Jakodin të bashkisë Roskovec, në Fier.
Mësohet se flakët kanë përfshirë rreth 20 hektarë sipërfaqe toke. Si pasojë, raportohet se janë djegur dhjetëra koshere bletësh, ndërsa rrezikohen disa banesa dhe stalla pularish.
Në vendin e ngjarjes kanë mbërritur menjëherë forcat zjarrfikëse të bashkisë Roskovec, të cilave i kanë ardhur në ndihmë dhe ato të Patosit e të Fierit.
Ndërkohë, po punohet ende për të vënë nën kontroll flakët, të cilat po përhapen me shpejtësi edhe me ndihmën e erës.
