Vazhdon të rritet numri i viktimave nga zjarret që kanë përfshirë prej ditësh Kaliforninë.
Të paktën 40 persona kanë humbur jetën, ndërsa qindra të tjerë vazhdojnë të jenë në kërkim. Sipas autoriteteve shumë viktima janë shpërfytyruar nga djegiet, ndaj është i pamundur identifikimi i tyre.
Më shumë se 10,000 zjarrfikës janë duke luftuar ne16 vatrat e zjarrit që janë ende aktive. Erërat që arrijnë deri në 70 km për orë dhe moti i thatë kanë ndihmuar në përhapjen e flakëve, duke detyruar mijëra banorë të evakuohen.
Deri më tani mijëra fshatra, mijëra shtëpi dhe biznese të njohura për prodhimin e verës janë shkrumbuar.
Një nga zonat më të prekura është qyteti i Santa Rosa. 3000 njerëz u evakuuan të shtunën për t’i shpëtuar flakëve, duke e çuar në të paktën 100 mijë numrin e të evakuuarve.
Guvernatori i Kalifornisë Jerry Brown tha se kjo është një nga tragjeditë më të mëdha që shteti ishte përballur ndonjëherë dhe se shkatërrimi është thjesht i pabesueshëm.
Zjarret kanë shkrumbuar më shumë se 221,000 hektarë në të gjithë Kaliforninë. Ende nuk dihen shkaqet e vërteta të rënies së flakëve, por pista kryesore është ajo e zjarrvenies së qëllimshme.
