Ministria e Mbrojtjes ka bërë publike situatën e zjarreve në vend gjatë 24 orëve të fundit. Në total janë raportuar 27 vatra zjarri, nga të cilat 4 vijojnë të jenë aktive, ndërsa 4 të tjera janë nën mbikëqyrje.
Për përballimin e situatës janë angazhuar 432 forca operacionale dhe 43 automjete zjarrfikëse, të mbështetura nga 70 forca të Forcave të Armatosura dhe 3 helikopterë të Forcës Ajrore.
Për ditën e sotme parashikohet angazhimi i 90 forcave ushtarake në bashkitë Bulqizë, Mat dhe Tiranë.
Katër vatrat aktive
Dajt, Tiranë: Vijojnë vatrat aktive në drejtim të Qafë-Priskës. Gjatë ditës së djeshme u angazhuan 15 zjarrfikës, 9 forca të ADZM-së, 20 ushtarakë dhe një helikopter. Nuk raportohet rrezik për zonat e banuara.
Vajkal, Bulqizë: Zjarri vijon në një sipërfaqe të gjerë me shkurre dhe dëllinja, në terren shkëmbor. Në operacion janë angazhuar 11 forca të MZSH-së, 5 forca pyjore, 7 vullnetarë dhe 30 ushtarakë.
Lundre, Mat: Zjarri vijon në një sipërfaqe të konsiderueshme pyjore. Në terren janë angazhuar 40 forca të MZSH-së dhe shërbimeve pyjore, 20 ushtarakë dhe një helikopter.
Ura e Shtrenjtë, Shkodër: Vatra vijon të jetë aktive në terren të thepisur, ndërsa ekipet në terren po punojnë për izolimin e saj dhe parandalimin e përhapjes.
Katër vatra nën mbikëqyrje
Nën monitorim vijojnë situatat në Qafën e Helmës në Bulqizë, Qafën e Lugut në Korçë, malin e Qukësit në Prrenjas dhe Zhejë në Kurbin.
Sipas Ministrisë së Mbrojtjes, në asnjërën prej këtyre zonave nuk raportohet rrezik për zonat e banuara.
Agjencia Kombëtare e Mbrojtjes Civile vijon monitorimin e situatës në të gjithë territorin e vendit, në koordinim me prefekturat, bashkitë dhe strukturat e Mbrojtjes Civile.
Autoritetet bëjnë me dije se kapacitetet operacionale mbeten në terren dhe në gatishmëri për ndërhyrje, me prioritet mbrojtjen e jetës së qytetarëve, banesave dhe pasurisë së tyre.
/vizionplus.tv
