Për një orë e 30 minuta, nxënësit e klasave të pesta iu nënshtruan testimit për Vlerësimin e Arritjeve në Arsimin Fillor, një proces që mat njohuritë e fituara gjatë ciklit fillor përmes pyetjeve në tri lëndët bazë: Gjuhë shqipe, Matematikë dhe Dituri natyre.
Për shumicën e nxënësve, testi u konsiderua i një niveli mesatar.
“Ushtrimet ishin të thjeshta sepse kisha mësuar dhe isha përgatitur që më parë, dhe mësuesja na ka dhënë shumë ushtrime”.
“Matematika ishte më e thjeshtë sepse e pëlqej, kurse gjuhën shqipe e kam pak të vështirë sepse nuk i di aq mirë kundrinorët dhe rrethanorët”.
“Pyetjet ishin më të thjeshta në gjuhë sesa në matematikë”.
“Më e lehtë ishte gjuha pasi kam mësuar më shumë për gjuhën”.
“Mua më dukej dituria më e lehtë sepse mësojmë gjëra për shkencën”.
Prej muajsh, nxënësit janë përgatitur për këtë provim, duke u ushtruar me testet e viteve të kaluara, por edhe përmes testeve provë të organizuara nga shkollat.
“Ka dy ose tre muaj që përgatitem unë”.
“Unë kisha shumë kohë që përgatitesha para testimit”.
“Isha përgatitur shumë për këtë moment, nuk kisha aspak emocione”.
“Që në shtator kam filluar të përgatitem, sepse e dija që është test që përfshin pesë vitet”.
“Kam kohë që përgatitem me testet”.
Këtë të enjte, testimit iu nënshtruan mbi 27 mijë nxënës në të gjithë vendin, ndërsa rezultatet pritet të shërbejnë si një pasqyrë e nivelit të njohurive të fituara gjatë arsimit fillor.
