Partia Demokratike ka njoftuar se nuk do të ketë një kandidati për zgjedhjet e Bashkisë së Kukësit. Në një reagim të degës së PD në Kukës, thekson se kjo vjen si nevojë për të mos thelluar përçarjen e krijuar.
“Partia Demokratike Dega Kukës, duke ndjekur me përgjegjësi të lartë politike dhe morale situatën e krijuar në Kukës, pas diskutimeve dhe konsultimeve me anëtarët dhe strukturat drejtuese të Partisë Demokratike Dega Kukës; duke vlerësuar se interesi i demokratëve dhe i të gjithë qytetarëve të Kukësit që duan ndryshim është rrëzimi i qeverisë, në kushtet e kohës së shkurtër dhe të pamjaftueshme për të riorganizuar degën e partisë pas pasojave tepër negative të frymës së konfliktit të ndezur padrejtësisht mes demokratëve, gjykojmë se tani është koha që së pari të fokusohemi te ringritja e degës së Partisë Demokratike, krijimi i alternativës që presin qytetarët e Kukësit dhe në betejën për rrëzimin e kësaj qeverive, që po i varfëron çdo ditë e më shumë shqiptarët”, thuhet në njoftim.
Sipas PD zyrtare, ky vendim do t’i shërbejë demokratëve dhe unifikimit të opozitës.
“Për këtë arsye, ne nuk do të propozojmë kandidat për zgjedhjet për Bashkinë e Kukësit.
Partia Demokratike Dega Kukës qëndron fuqimisht në mbrojtje të interesave të kuksianëve, në mbështetje të tyre. Kuksianët meritojnë një alternativë që do t’u shërbejë atyre dhe jo gara të paracaktuara nga oligarkët në kurriz të demokratëve”
Kjo e premte ishte dhe afati i fundit që PD e “Bashës” të regjistronte kandidatin e saj në zgjedhjet e parakohshme për Bashkinë Kukës.
Nga ana tjetër, opozita do të kandidojë me Emri Vatën, i cili do të garojë nën logon e koalicionit “Bashkë Fitojmë”.
