Presidenti ukrainas, Volodymyr Zelensky, ndodhet në Holandë për një vizitë zyrtare. Ai do të takohet me kryeministrin Mark Rutte e po ashtu do të mbajë një fjalim në Hagë. Zelensky pritet të zhvillojë një vizitë edhe në Gjykatën Penale Ndërkombëtare.
Vizita e Zelenskyt vjen pasi Gjykata e mbështetur nga OKB-ja, ka nisur hetimet për krimet e mundshme të luftës të kryera nga Rusia dhe në mars lëshoi një urdhër arresti ndërkombëtar për presidentin rus Vladimir Putin.
Holanda deri tani i ka ofruar Ukrainës një ndihmë ushtarake prej rreth 1.2 miliardë eurosh, në mënyrë që të mbrohet ndaj agresionit ushtarak.
Ndërkohë në frontin e luftës, situata vijon të jetë e tensionuar. Vetëm një ditë pasi Rusia akuzoi Ukrainën për kryerjen e një sulmi me dron ndaj Kremlinit, janë dëgjuar shpërthime në Kiev dhe qytete të tjera si Zaporizhia dhe Odesa në jug.
