Është finalizuar nga Sektori i Krimit Ekonomik dhe Financiar në bashkëpunim me Prokurorinë e Korçës, pas 18 muajsh hetime me metoda speciale, operacioni policor i koduar “Green Code”, që çoi në goditjen e një skeme të gjerë korrupsioni dhe falsifikimi në skemat e mbështetjes për fermerët.
Sipas Policisë, 2 inspektorë të AZHBR-së dhe 6 veterinerë të Drejtorisë së Bujqësisë Pogradec u pezulluan nga detyra, ndërsa një tjetër inspektor i AZHBR-së u shpall në kërkim.
Të gjithë dyshohen se, në bashkëpunim me njëri-tjetrin, kanë pasqyruar të dhëna të rreme në aktet e verifikimit dhe kontrolleve në fermat përfituese nga skema kombëtare e mbështetjes për fermerët.
Hetimet zbuluan se inspektorët e AZHBR-së nuk kryenin kontrollet në terren për gjendjen reale të kafshëve, ndërsa merrnin në mënyrë korruptive shuma që varionin nga 10 000 deri në 50 000 lekë, duke shkaktuar dëm të konsiderueshëm ekonomik për buxhetin e shtetit.
Të pezulluarit përfshijnë:
– A. M., 33 vjeç, dhe J. Z., 36 vjeç, inspektorë të AZHBR-së, të dyshuar për “Korrupsion pasiv” dhe “Falsifikim dokumentesh në bashkëpunim”;
– D. Ç., 57 vjeç, dhe F. I., 54 vjeç, veterinerë të Drejtorisë së Bujqësisë Pogradec;
– E. Gj., 56 vjeçe, P. R., 66 vjeç, B. B., 28 vjeç, dhe E. F., 33 vjeç, veterinerë kontrolli e shërbimi, të dyshuar për “Falsifikim dokumentesh”.
Në kërkim është shpallur A. B., 48 vjeç, inspektor i AZHBR-së, për korrupsion dhe falsifikim.
Policia bëri me dije se hetimet vijojnë për identifikimin dhe ndëshkimin e personave të tjerë të përfshirë në skemën e mashtrimit.
