Xhelal Mziu, shqiptarëve: 5 mijë lekëshi që keni marrë do të jetë mallkim për ju

Në reagimin falënderues që bëri për ata që mbështetën PD me votë, Xhelal Mziu kishte një mesazh edhe për ata që sipas tij, kanë shitur votën.

Shuma që kanë marrë në këmbim të votës, tha Mziu, do të jetë mallkim për ta sa herë që të përballen me shërbimet.

“Kam edhe dy fjalë për ata dibranë të ndershëm ose jo, që për shkak të varfërisë apo për problemet e tyre ia shitën shpirtin “shejtanit” shitën votën, shitën nderin, u shitën për 4 vjet me 5 mijë lekë…!Vota juaj nuk bën 5 mijë lekë! Ai 5 mijë lekësh do ju dalë në ëndërr për 4 vjet, sa herë t’ju mbarojë thesi i miellit, sa herë tu duhet të shkoni në spital,sa herë të shkoni më dyqan, sa herë tu drejtoheni shkollave, universiteteve, zyrave të shtetit. Ai 5 mijë lekësh do t’u vrasë në shpirt sa herë të mos keni lekë për t’u blerë librat e fëmijëve, apo kur t’u dalin gishtat nga atletet e “gabit”. Ai 5 mijë lekësh do të jetë mallkim, për ju, fëmijët tuaj do t’ju mallkojnë…!”

Këshilla e tij për qytetarët ishte kjo: “Si vëllezërit e mi ju këshilloj mos u shisni kaq lirë, mos ia shisni fatin e fëmijëve bandave të krimit të organizuar, mos ia shisni nderin kësaj makinerie qeveritare të pandershme që të blen një ditë për 4 vjet. Nderi i Dibranit nuk është aq i pavlefshëm…!”