Ministër i Brendshëm i dorëhequr, Fatmir Xhafaj ka zhvilluar një fjalim të fundit përshëndetës me përfaqësues të Ministrisë së Brendshme, dhe të Policisë së Shtetit.
Në këtë fjalim ish-ministri Xhafaj sulmoi opozitën për akuzat që kjo e fundit lëshon ndaj këtij institucioni dhe faktin që ajo nuk ka qenë asnjëherë bashkëpunuese në punën dhe në operacionet e realizuara nga policia e Shtetit në Luftën kundër krimit.
“Sa herë që policia godet krimet, një pjesë e opozitës komenton negativisht aksionet e policisë. Policia gjendet e sulmuar nga orkestrimet e opozites dhe një pjesë e medias. Sa më shumë rritet forca goditëse e Policisë së Shtetit, rritet dhe agresivitet i këtyre segmenteve, fundi i të cilëve është i pashmangshëm. Pjesa e shëndoshë e shoqërisë duhet të kuptojë se çdo sulm ndaj policisë është luftë kundër oksigjenit të shoqërisë”.
Lufta kundër kultivimit e trafikimit të kanabisit ishte një ndër prioritetet tona kryesore dhe ndër të parat premtime publike që ne e kemi përmbushur plotësisht.
“Lufta kundër kultivimit e trafikimit të kanabisit – ishte një ndër prioritetet tona kryesore dhe ndër të parat premtime publike që ne e kemi përmbushur plotësisht. Menaxhimi më i mirë kufijve, me objektiv kryesor frenimin e fenomenit të azil kërkimit dhe migracionit ilegal ishte një tjetër prioritet i rëndësishëm dhe i konsideruar i suksesshëm për ne në këtë vit të parë të këtij mandati. Lufta kundër krimit të organizuar përmes operacionit “Forca e Ligjit” padyshim që ka qenë dhe mbetet prioriteti ynë kyç”
Në këtë fjalë me përfaqësuesit e ministrisë Xhafaj theksoi dhe faktin se dorëheqja ishte pjesë e vendimeve të tij.
“Po largohem nga kjo detyrë, rrjedhojë e një vendimi të pa imponuar nga ndonjë rrethanë objektive, apo subjektive, por si një vendim i marrë besoj në kohën e duhur, pasi përmbusha, besoj, më së miri objektivat kryesore që i vura vetes në ditën kur vendosa ta pranoja dhe ri-pranoja këtë sfidë”.
Ndërkohë, Xhafaj e mbylli fjalimin e tij të gjatë me një urim për pasardhësin e tij, ndërsa ende ky pozicion është bosh, pasi kompetencat do t’i komandohen zv.ministrit të ri të Brendshëm Sandër Lleshit.
Gjithashtu ish-ministri ka theksuar se do të vijojë të jetë mbeshtetës ndaj nismave të policisë dhe të ministrisë se Brendshme.
