Gjykata e Shkodrës caktoi masën “arrest në burg” për Ragip Gilën, autorin e dyshuar të vrasjes së Armando Palit dhe Liridon Krajës.
Në seancën gjyqësore të kryesuar nga gjyqtarja Ermira Dedja, ai mbërriti nën masa të rrepta sigurie, shoqëruar nga forcat Shqiponja dhe FNSH.
Përballë togave të zeza Ragip Gila vendosi të heshtë, duke mos thënë asnjë fjalë mbi atentatin me 2 viktima dhe 2 të plagosur, që tronditi Shkodrën mëngjesin e 8 shtatorit.
As avokati mbrojtës nuk pranoi të japë detaje për mediat, duke mos treguar se çfarë kishte kërkuar për klientin e tij.
Ndërsa prokurori i çështjes, Pjerin Çukaj i qëndroi kërkesës së arrestit me burg për të riun Gila. Ndryshe nga qëndrimi në gjykatë, në dëshminë përpara oficerëve të policisë, Ragip Gila tha se shënjestra e tij ishte 44-vjeçari Erogen Vaso alias Bajroviç, i cili mbeti i plagosur.
Nga ana e tij, 44-vjeçari Bajroviç mohoi të ketë lidhje me bandat në Shkodër dhe se nuk e njeh autorin.
Ragip Gila u arrestua nga forcat “Shqiponja” disa minuta pas ngjarjes, teksa po tentonte të largohej nga vendngjarja. Si provë materiale ju sekuestruan dy armët e përdorura në ngjarje, një pistoletë dhe një automatic scorpions, jeleku antiplumb si dhe skafandra./vizionplus.tv
