Policia e Tiranës ka shpallur në kërkim 31 vjeçarin Ervis Lami, ndërsa është vendosur në pranga djalit i xhaxhait të tij, Eduart Lami, pasi në banesën që përdornin dy kushërinjt u gjet automatik me silenciator.
Një nga të dyshuarit është Ervis Lamin, i njohur për arratisjen nga burgu i Drenovës, banesa e të cilit ka qenë ndër të parat që u kontrollua nga policia. Sipas informacioneve, gjatë kontrollit, në shtëpinë e tij u gjet arma tip pistoletë me silenciator. Lami nuk ka qenë në shtëpi në momentin e aksionit, por dera është hapur nga një anëtar i familjes së tij. Ndërkohë, është zbuluar se Lami ka dy shtëpi, njëra prej të cilave është një shtëpi druri, ku brenda janë gjetur vrima në mure, të cilat dyshohet se janë shkaktuar nga përdorimi i armëve të zjarrit. Hetuesit mendojnë se këto vrima mund të jenë bërë për të provuar armë të ndryshme.
Lexo edhe :
Related Posts
Pas kapjes së tij, Lami pritet të merret në pyetje për vrasjen e 48-vjeçarit Lulzim Visha, duke u konsideruar si një person që mund të ketë dijeni për ngjarjen. Ervis Lami ka qenë gjithashtu i përfshirë në arratisjen e 7 të dënuarve nga burgu i Drenovës më 23 nëntor 2013, mes të cilëve ishte edhe Admir Tafili. Gjatë asaj periudhe, Lami kishte pranuar se ai dhe Tafili kishin planifikuar arratisjen dhe se ai kishte siguruar armët për këtë qëllim.
Grupi hetimor ka dyshime se Lulzim Visha ka pasur konflikte të mëparshme me Ervis Lamin dhe po e shqyrton këtë si një pistë të mundshme në hetimet për vrasjen.
Njoftimi i policisë:
Kontrolle intensive dhe punë profesionale hetimore për zbardhjen e ngjarjes, identifikimin dhe kapjen e autorëve të vrasjes së 48-vjeçarit, mëngjesin e djeshëm në Kamëz.
Në kuadër të kontrolleve bazuar në inteligjencën policore, Strukturat hetimore dhe operacionale të DVP Tiranë, në kuadër të operacionit policor të koduar “Silenciatori”, goditën një rast të armëmbajtjes pa leje.
Gjatë kontrollit në banesën e shtetasit E. L, në rrugën Paqësore, Zall Mner, Kamëz, shërbimet e Policisë gjetën dhe sekuestruan në cilësinë e provës materiale një armë zjarri automatike me silenciator dhe municion luftarak, 15 copë fishekë luftarak, një sopatë, një thikë, një këllëf pistolete glok dhe në oborrin e banesës janë gjetur 4 gëzhoja armë .
Në vijim të veprimeve hetimore u bë arrestimi në flagrancë i shtetasit E. L., 37 vjeç, banues në Kamëz., për veprat penale “Mbajtja pa leje dhe prodhimi i armëve, armëve shpërthyese dhe e municionit” dhe “Prodhimi, mbajtja, blerja apo shitja pa leje e armeve të ftohta”.
Po në kuadër të operacionit si rezultat i veprimeve hetimore u bë shpallja në kërkim dhe vijon puna për kapjen e shtetasit E. L., 31 vjeç.
Nga tërësia e veprimeve paraprake hetimore, administrimit të provave dhe fakteve, rezulton se banesa ku janë gjetur sendet e kundraligjshme është në posedim të shtetasit E.L dhe përdoret nga të dy shtetasi E.L 37 dhe E.L 31 vjec.
Arma e zjarrit, gëzhojat si dhe sendet e tjera të sekuestruara në banesë po dërgohen në Institutin e Policisë Shkencore për ekzaminime të mëtejshme për të parë nëse kjo armë zjarri është përdor në ngjarje kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.
