Prokuroria e Korçës ka përfunduar hetimet për ngjarjen e rëndë të ndodhur më 10 gusht të vitit të kaluar në lagjen nr.1 të qytetit të Pogradecit, ku mbeti i vrarë 42-vjeçari Egli Proga. Pas disa muajsh hetimesh, organi i akuzës ka vendosur të çojë për gjykim katër persona të përfshirë në ngjarje.
Denis Meçe, autori i dyshuar i ngjarjes, do të përballet me akuzën e vrasjes me dashje, ndërsa tre shtetas të tjerë, Leonidha Guce, Voltan Shkulaku dhe Arjan Manellari, akuzohen për veprime që pengojnë zbulimin e së vërtetës si dhe për moskallëzim krimi.
Sipas burimeve pranë prokurorisë, akuzat pritet të komunikohen zyrtarisht në Institutin e Ekzekutimit të Vendimeve Penale në Drenovë, ku ndodhen të paraburgosur të dyshuarit.
Ndërkohë, hetimet për këtë ngjarje nuk janë mbyllur plotësisht. Prokuroria ka vendosur ndarjen e çështjes përsa i përket dyshimeve për shpërdorim detyre nga ana e punonjësve të policisë, çka tregon se hetimet në këtë drejtim vijojnë.
Ngjarja një vit më parë tronditi opinionin publik në Pogradec, ndërsa akuza pritet të bëje me dije më shumë detaje pas komunikimit zyrtar të akuzave./vizionplus.tv
