Deputetja e PD për qarkun e Durrësit, Manjola Luku ka reaguar pas ngjarjes tragjike që ndodhi në Manëz në orët e para të mëngjesit, ku humbën jetën dy të rinj pas një konflikti të çastit.
Luku, e cila jeton në këtë zonë, ka shprehur shqetësimin dhe dhimbjen e saj të thellë për krimin që ka tronditur komunitetin.
Ajo u ka bërë thirrje organeve të rendit dhe drejtësisë që të veprojnë me shpejtësi dhe vendosmëri për të zbardhur plotësisht rrethanat e ngjarjes dhe për të vënë autorët përpara ligjit.
Gjithashtu, deputetja Luku ka përcjellë ngushëllimet e saj më të sinqerta për familjet e viktimave, duke e cilësuar këtë humbje si të rëndë dhe të parakohshme për komunitetin e Manzës.
Reagimi i Manjola Lukut:
Si deputete e zonës, por edhe si banore e këtij komuniteti, shpreh shqetësimin dhe dhimbjen e thellë për ngjarjen e rëndë që ndodhi në Manëz, ku humbën jetën dy të rinj.
Kjo ngjarje është tronditëse dhe e papranueshme për të gjithë ne.
U bëj thirrje institucioneve të rendit dhe drejtësisë të veprojnë me shpejtësi dhe vendosmëri për të zbardhur plotësisht rrethanat dhe për të vënë autorët përpara ligjit.
Dhuna dhe armët nuk mund të jenë kurrë zgjidhje,ato shkatërrojnë jetë, familje dhe dëmtojnë besimin e qytetarëve te siguria dhe drejtësia.
Ngushëllimet më të sinqerta familjeve të viktimave për këtë humbje të rëndë dhe të parakohshme.
