Gjykata e Durrësit la në burg tre fëmijët e familjes Meta të cilët organizuan vrasjen e babait të tyre Pëllumb Meta. Prokurorja tha se të tre të rinjtë janë përgjegjës për krimin, megjithëse autorësinë për ngjarjen e mori sërish 19-vjeçarja Hygerta Meta. Përtej fjalëve të ftohta për pendesë e keqardhje për vrasjen e babait të tyre, fëmijët u shfaqën të qetë gjatë seancës.
Akuzat që rëndojnë ndaj Hysen, Amarildo dhe Hygerta Metës janë ato të vrasjes për shkak të marrëdhënieve familjare dhe fshehje e asgjësim i kufomës, kryer në bashkëpunim.
Lexo edhe :
Related Posts
Me nisjen e seancës, Hygerta Meta deklaroi se është ajo që ka kryer krimin, duke rrëzuar deklaratën e mëparshme që aktin e rëndë e ka kryer djali i madh Hyseni.
Hygerta tregoi se i ati ishte i dhunshëm dhe disa herë kishte kërcënuar se do t’i vriste.
“Duke qenë që ishte shumë e vështirë si dhe nga frika nga policia ja lashë fajin e vrasjes vëllait. Konflikti me babain ka nisur që në dhjetor. I thashe jo për fejesën. Kisha frikë se nga refuzimi i fejesës se do më vriste. Ai preu bomblën e gazit dhe nuk e rregullloi, por më vonë në fund të janarit më tha sërish për fëjesën. Më tha që ju nuk keni për të bërë hajër ne këtë shtëpi, kishim frikë. Ka pasur konflikte dhe me mamin, e ka goditur mamin edhe kur ka qenë në gjumë për shkak se ishte zgjuar vonë. Babi ka qenë gjithmonë agresiv. Nuk e kam denoncuar nga frika, sepse kishim frikë të na vriste. Shumë herë na ka thënë do ju vras, madje ai mund të paguante edhe dike për të na vrarë”, tha Hygerta.
Vajza rrëfeiu edhe momentin e vrasjes:
“Unë e dija që kishte armë dhe dija momentin kur vinte nga puna. Erdhi babi nga puna, ra duke pushuar, ishte me kurriz dhe mora armën. Ja tregova babit, më tha ku shkon me atë armë. Kur më tha ku shkon me të, i thashë çohu në këmbë. Ai më tha ik andej. Unë e qëllova pas kësaj. Isha 2 metra larg.”
Ndërkohë edhe djali i madh, Hysen Meta duke hequr përgjegjësinë nga vetja, tha se motra e tij e ka kryer krimin.
“Motra e ka qëlluar babain, jo unë. Arsyeja është që donte ta fejonte me zor. Kishin debatuar shumë herë. Unë nuk kam qenë gjithmonë prezent në debatet e tyre dhe me babain mardhëniet kanë qenë jo shumë të mira. Kam qenë i hutuar dhe i tronditur ndaj thashë në fillim që e kam bërë unë”, tha Hysen Meta.
Ndërsa, djali i vogël i Pëllumb Metës, Amarildo, tha se nuk ka qenë në dijeni të ngjarjes.
Pas përfundimit të dëshmive, avokatët e tre të rinjve kërkuan një masë më të butë për Hygertën me arsyetimin se ajo është e re dhe duhet të vazhdojë studimet. Të njëjtën kërkesë ata patën edhe për djalin e vogël duke qenë se ai nuk ka qenë i pranishëm në momentin e krimit. Por gjykata hodhi poshtë pretendimet, me arsyetimin se dëshmitë janë kontradiktore duke i lënë në burg të tre.
Jashtë dyerve të gjykatës avokatja e Hygertës dhe djalit të vogël të familjes Amarildos, tha se për shkak të deklaratave kontradiktore hetimet për ngjarjen duhe të vijojnë.
“Hygerta pranoi veprën , sot tha jam unë ajo që e ka kryer . do vazhdojnë hetimet se pse prokuroria e akuzon për fshehjen e kufomës dhe jo për vrasje. Janë bërë deklarata kontradiktore dhe duhen hetime shtesë”, tha avokatja.
Krimi që tronditi opinionin publik u zbulua tre ditë më parë, kur policia gjeti trupin e 49-vjeçarit, pellumb meta. Ai ishte shpallur i zhdukur prej 13 shkurtit, pas denoncimit të djalit të madh se kishte humbur kontaktet me babanë.
Por ajo që u denoncua si zhdukje ishte në fakt një vrasje. Policia zbuloi se Pëllumb Meta ishte vrarë më 10 shkurt nga djali i madh, Hysen Meta dhe për të fshehur trupin e të atit ishte ndihmuar nga djali i vogël, Amarildo 21-vjeç dhe vajza Hygerta, 19-vjeçe. Ndërkohë, nëna e tyre Blerina Meta po hetohet në gjendje të lirë për moskallëzim krimi./vizionplus.tv
