Policia e Vlorës ka finalizuar me sukses një operacion për goditjen e veprimtarisë kriminale në fushën e vjedhjes së pasurisë, duke arrestuar dy persona të dyshuar si autorë të një vjedhjeje në fshatin Panaja.
Dy të rinjtë, 33 dhe 24 vjeç u kapën në flagrance ditën e djeshme teksa transportonin me një automjet tip “Mercedes Benz” një mjet bujqësor për punimin e tokës (frezë), të cilin e kishin vjedhur pak më parë.
“Strukturat hetimore të Komisariatit të Policisë Vlorë, në vijim të punës për evidentimin dhe dokumentimin e rasteve të vjedhjes së pasurisë, identifikuan dhe bënë ndalimin e dy autorëve të dyshuar për një rast vjedhjeje në fshatin Panaja, konkretisht shtetasve:
- L. F., 33 vjeç, banues në fshatin Kaninë, Vlorë;
- N. K., 24 vjeç, banues në fshatin Kaninë, Vlorë.
Këta shtetas u kapën në flagrancë nga shërbimet e Policisë, më datë 24.09.2025, në fshatin Panaja, pasi kishin vjedhur një mjet bujqësor për punimin e tokës (frezë), të cilin po e transportonin me një automjet tip “Mercedes Benz”.
Vijon puna për dokumentimin e rasteve të tjera të vjedhjeve, me autorë të dyshuar këta shtetas.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprën penale “Vjedhja”, kryer në bashkëpunim”, thuhet në njoftim.
/vizionplus.tv
