Partia në pushtet, VMRO-DPMNE, shpalli fitore bindëse pas raundit të parë të zgjedhjeve lokale që u mbajtën të dielën në Maqedoninë e Veriut.
Partia do të ketë kryetarë në 30 nga 80 komuna në total, dhe pret që në raundin e dytë të fitojë edhe në rreth 20 të tjera, përfshirë edhe kryeqytetin Shkup, ku kandidati i saj, është në avantazh.
Kryetari i VMRO-DPMNE, Hristjan Mickoski tha se është i kënaqur, pasi numri i përgjithshëm i votave të fituara është më i madh se në zgjedhjet parlamentare dhe ato lokale të mëparshme ndërsa përjashtoi edhe mundësinë për zgjedhje të parakohshme parlamentare, pavarësisht insistimit nga opozita shqiptare.
Opozitarja maqedonase LSDM pësoi edhe një humbje pas zgjedhjeve të vitit të kaluar, parlamentare dhe presidenciale.
Megjithatë, partia vlerësoi se rezultati nuk është i keq, pasi këtë herë ka fituar më shumë vota në disa komuna dhe theksoi se ka pasur shkelje të shumta gjatë procesit të votimit.
Nga ana tjetër në bllokun politik shqiptar kryesoi bindshëm koalicioni VLEN me fitoren në komunën kyç Çairin, Tetovën dhe gjashtë komuna të tjera.
Koalicioni Aleanca Kombëtare për Integrim e udhëhequr nga BDI e Ali Ahmetit pësoi humbje ndërsa arriti të fitojë në raundin e parë në Gostivar, Likovë, Çashkë dhe Plasnicë.
Raundi i dytë parashikohet të zhvillohet më 2 nëntor 2025. Ky raund pritet të vendosë përfundimisht kontrollin mbi administratën lokale për të ardhmen./vizionplus.tv
