Lumi Vjosë ka arritur pikën kritike dhe ka dalë nga shtrati, duke përmbytur tokat e kultivuara të fermerëve në fshatin Çerven, njësia administrative Frakull. Sipërfaqe të tëra të mbjella me elb, jonxhë, tërfil dhe ullinj ndodhen aktualisht nën ujë, ndërsa fermerët shprehen të alarmuar për prurje edhe më të mëdha në orët në vijim.
“Të gjitha tokat tona po notojnë sërish nën ujë. Ende nuk kemi marrë veten nga pasojat e përmbytjeve të nëntorit dhe ja ku jemi përsëri”, thonë fermerët të indinjuar.
Tokat brenda dhe jashtë argjinaturës, të cilat fermerët e Çervenit i disponojnë me ligjin 7501, janë të gjitha të përmbytura. Pavarësisht se paguajnë rregullisht taksat e tokës, ata theksojnë se nuk kanë përfituar kurrë dëmshpërblim për dëmet e shkaktuara nga përmbytjet.
“Po kalbemi e po falimentojmë”, shprehen banorë, duke theksuar se shteti për ta nuk ka ekzistuar kurrë, pasi i ka lënë në mëshirë të fatit.
Banorët e zonës shprehen të revoltuar për mungesën e institucioneve në terren.
“Përmbytje e paparë. S’po shoh këtu as deputet, as kryetar bashkie, as administrator, asgjë. Për 8 orë këtu nuk sheh më toka bosh. Shiu që ka rënë mbrëmë natën vjen këtu nga ora 2-3. Situata është shumë alarmante. Jonxhë, ullinj, të gjitha tokat i kemi në lum. Ne s’kemi marrë veten nga përmbytja e parë. Tokat tona janë nën ujë. Është i vetmi burim të ardhurash për ne. Për ne shteti është i vdekur.”
/vizionplus.tv
