Të paktën 22 persona humbën jetën dhe më shumë se 80 të tjerë u plagosën pasi një vinç u shemb mbi një tren pasagjerësh, duke shkaktuar një aksident të rëndë hekurudhor në veri të Tajlandës. Ngjarja ndodhi rreth orës 09:00 me orën lokale, në provincën Nakhon Ratchasima, gjatë punimeve për ndërtimin e një linje hekurudhore me shpejtësi të lartë.
Sipas autoriteteve lokale, vinçi i vendosur në një kantier ndërtimi u rrëzua papritur mbi trenin me tre vagona, i cili u përfshi nga flakët pas përplasjes dhe doli nga shinat. Në tren ndodheshin gjithsej 195 pasagjerë, ndërsa disa prej vagonëve pësuan dëme të rënda. Dëshmitarë okularë folën për një zhurmë të fortë të ndjekur nga shpërthime, ndërsa metali i vinçit kishte prerë pothuajse më dysh një nga vagonët.
Ekipet e emergjencës dhe shpëtimit mbërritën menjëherë në vendngjarje, por operacionet u ndërprenë përkohësisht për shkak të një rrjedhjeje të dyshuar kimike, pa u bërë e ditur origjina e saj. Ministri tajlandez i Transportit deklaroi se do të kryhet një hetim i plotë për të zbardhur shkaqet e aksidentit dhe për të përcaktuar përgjegjësitë.
Vinçi ishte pjesë e një projekti të madh infrastrukturor për ndërtimin e rrjetit hekurudhor me shpejtësi të lartë, i cili pritet të lidhë Bangkokun me Kunmingun në Kinë përmes Laosit. Projekti, me vlerë rreth 5.4 miliardë dollarë, mbështetet nga Kina në kuadër të nismës “Një brez, një rrugë”. Tajlanda ka përjetuar edhe në të kaluarën aksidente të rënda në transport dhe në kantiere ndërtimi, shpesh të lidhura me mungesën e respektimit të rregullave të sigurisë.
/vizionplus.tv
