Në Dhomat e Specializuara të Kosovës në Hagë ka nisur këtë të hënë dëshminë e tij ish-diplomati britanik John Stewart Duncan, i thirrur nga mbrojtja e ish-presidentit të Kosovës, Hashim Thaçi.
Duncan ka mbajtur gjatë kohës së luftës, detyrën e këshilltarit politik të ish-komandantit suprem të Forcave Aleate të NATO-s, Wesley Clark, i cili udhëhoqi fushatën ajrore kundër caqeve ushtarake serbe, më 1999.
Në nisje të dëshmishë ish diplomati tha se UÇK-ja kishte përbërje heterogjene me njerëz me përvoja të ndryshme.
“Kur filloi të përshkallëzohej spastrimi etnik, përbërja e pjesëtarëve kryesorë ishte shumë e larmishme: kishte ish-ushtarë të Armatës jugosllave, juristë, mjekë, gazetarë dhe njerëz të tjerë, disa me familje të keqtrajtuara. Arsyeja që morën armët, ndryshonte nga personi në person”, tha Duncan.
Më tej ai dëshmoi se informacionet për situatën në terren i merrte nga burime të ndryshme përfshirë mediat asokohe, kabllogramet, shërbimet e monitorimit si dhe bisedat me persona të ndryshëm.
Dëshmia e mbrojtjes për Thaçin dhe të tjerët nisi javën e kaluar me ish-ndihmësin e sekretarit amerikan të Shtetit, James Rubin, dhe këshilltarin ligjor të delegacionit të Kosovës gjatë negociatave në Rambuje më 1999, Paul ËILLIAMS.
Rubin, gjatë tri ditëve, foli kryesisht për rolin e Thaçit në luftë, për të cilin tha se ishte politik dhe nuk kishte kompetenca për vendime ushtarake brenda UÇK-së dhe se nuk ka asnjë informacion që e lidh Thaçin ose Krasniqin me pretendimet për vrasje./vizionplus.tv
