Juristi amerikan, Paul Williams është dëshmitari i dytë në kuadër të mbrojtjes së ish-presidentit Hashim Thaçi në Hagë.
Williams ka thënë se ka punuar në mënyrë intensive me anëtarët e delegacionit të Kosovës në Rambuje, por edhe me diasporën shqiptare gjatë bisedimeve që u zhvilluan atje.
Ai, para trupit gjykues në Hagë, ka deklaruar se sa i takon Rambujesë i është kërkuar nga Fehmi Agani, që të përpilojë dhe të përgatisë dokumentin që të ishte sa më gjithëpërfshirëse që Tribunali Penal Ndërkombëtar për ish-Jugosllavinë të kishte të gjitha përgjegjësite për të zbatuar mandatin e tij.
“Gjatë dy ditëve të para, sa isha në kështjellë, më ftuan që t’i jepja një prezantim delegacionit kosovar për katër tema. Tema e katërt ishte juridiksoni dhe aktivitetet pra hetimet, aktakuzat e Gjykatës së Tribunalit për ish-Jugosllavinë. Të gjithë anëtarët e delegacionit ishin të pranishëm, kjo përfshinte edhe mësime që kishin nxjerrë nga koha kur unë punoja si këshilltar ligjor për boshnjakët në Marrëveshjen e Daytonit”, tha ai.
I pyetur se pse ishte e rëndësishme për delegacionin e Kosovës formimi i teksteve sa më të kuptueshme për Tribunalin e Ish-Jugosllavisë, Williams u përgjigj: Jurdiksioni dhe aftësia e Tribunalit për ish-Jugosllavinë ishte e rëndësishme për disa arsye, konteksti konkret specifik menjëherë përpara bisedimeve ishte Masakra e Reçakut.
Williams nënvizoi ndër të tjera se e ka marrë përshtypjen nga faktorë të shumtë se Thaçi nuk kishte kontroll mbi qëndrimin e tij si kryesues i delegacionit në Rambuje.
“Pra nga njëra anë kishim telefonatat që bënte z. Thaçi, këshilltarët e jashtëm apo palët e treta, për shembull një person shqiptaro-amerikan po pjesëtarë të tjerë të UÇK-së që kishin ide shumë të qarta dhe mund ta lexoje pak edhe nga qëndrimi ose paraqitja. Pra ndonjëherë ke një koklavitje apo përzierje të aktorëve, shumë palë të tjera të cilat mua më kanë bërë që të arrij në këtë përfundim. Pra, krijohej përshtypja që dikush i kishte negociatat nën kontroll apo i kishte pjesërisht nën kontroll ato”, tha Williams.
Gjatë pyetjeve të mbrojtjes së Thaçit, Williams tha se ai bashkë me Mark Weller, i cili ka qenë këshilltar ligjor ndërkombëtar, e kanë përpiluar propozimin e delegacionit të Kosovës në Rambuje lidhur me hetimet dhe ndjekjen penale të krimeve të luftës.
Dëshmitari i mbrojtjes, Paul Williams tha se ka punuar dy vjet edhe në Departamentin Amerikan të Shtetit dhe se ka qenë jurist për çështjet evropiane.
Këtë të mërkurë ka përfunduar dëshmia e James Rubin, i cili gjatë luftës ka qenë ndihmës-sekretar amerikan i Shtetit. Dëshmia e tij në mbrojtje të ish-presidentit, Hashim Thaçi ka zgjatur tri ditë.
