Policia e Tiranës ka përfunduar me sukses operacionin e koduar “Tracking”, në kuadër të të cilit u arrestua shtetasi S. G., 47 vjeç, banues në Tiranë, i dënuar më parë për të njëjtën veprimtari kriminale.
Hetimet kanë dokumentuar 5 raste të vjedhjeve të kryera prej tij gjatë muajve të fundit, kryesisht në stacione autobusësh dhe në biznese, ku ka vjedhur celularë, portofola dhe shuma parash.
Gjatë operacionit u sekuestruan rreth 600 000 lekë, 8200 euro dhe një portofol i vjedhur.
Ndërkohë, në vijim të hetimeve, nisi procedimi në gjendje të lirë edhe për shtetasin Sh. P., 51 vjeç, pasi në dyqanin e tij u gjet një aparat celular i vjedhur nga autori i arrestuar.
Policia vijon punën për dokumentimin e vjedhjeve të tjera në qarkun e Tiranës, ku dyshohet se mund të jetë përfshirë 47-vjeçari.
Materialet për veprimet e mëtejshme iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
/vizionplus.tv
