Pasi stuhia “Nils” mori jetën e një gruaje, Spanja po përballet me një valë të re moti të keq, ndërsa stuhia “Oriana” është e radhës që godet Gadishullin Iberik.
Ajo po sjell shira të rrëmbyeshëm, erëra të forta dhe një rënie të dukshme të temperaturave në pjesën më të madhe të vendit, duke shkaktuar tashmë probleme.
Meteorologët paralajmërojnë për reshje dëbore edhe në lartësi jashtëzakonisht të ulëta dhe për kushte të vështira gjatë fundjavës. Pemët janë shkulur me rrënjë, rrugët janë përmbytur, ndërsa mijëra familje mbeten pa energji elektrike.
Tre persona kanë humbur jetën në incidente të lidhura me motin në Francë dhe Spanjë.
Stuhia Niels ka vrarë një person të dytë në Francë dhe një grua në Spanjë, ndërsa stuhia “jashtëzakonisht e rëndë” përfshiu Francën jugperëndimore dhe Katalonjën me erëra të forta, duke shkaktuar dëme të konsiderueshme, dhe vazhdon rrugën e saj drejt Evropës Lindore.
Një burrë që ishte “mbi një shkallë në kopshtin e tij” u vra në Tarn-et-Garonne, në Francën jugperëndimore, tha zëdhënësi i qeverisë franceze Mont Brejon për TF1 këtë mëngjes. Një shofer kamioni u vra dje nga një degë që binte gjatë stuhisë.
Në Spanjë, një grua vdiq pasi çatia e një depoje industriale u shemb në Barcelonë, në verilindje të vendit, thanë sot autoritetet rajonale. 46-vjeçarja ndërroi jetë nga plagët e saj pasi u dërgua në spital në gjendje kritike, thanë autoritetet katalanase.
Erërat që shoqëronin stuhinë Nils, me shpejtësi më shumë se 100 kilometra në orë, goditën Katalonjën dje, duke shkulur pemë, duke dëmtuar ndërtesa dhe duke ndërprerë trafikun ajror.
Gjashtë persona janë ende në spital në Katalonjë, katër prej tyre në gjendje të rëndë, pas motit të ri të keq, sipas autoriteteve, të cilat i kërkuan popullsisë të qëndronte vigjilente.
Leonardo dhe më pas Marta shkaktoi përmbytje të konsiderueshme dhe evakuimin e mijëra njerëzve nga shtëpitë e tyre në Andaluzi, në Spanjën jugore.
Vendi tani pret stuhinë Oriana, e cila pritet të sjellë erëra të forta, si dhe shira të rrëmbyeshëm, borë në disa zona dhe det të trazuar në bregdet.
Spanja, si dhe Portugalia, e cila u godit gjithashtu nga stuhia, janë ndër vendet evropiane më të ekspozuara ndaj ndryshimeve klimatike, duke u përballur me valë të nxehti gjithnjë e më të gjata dhe episode më të shpeshta dhe intensive të reshjeve të rrëmbyeshme.
