Moti i keq me stuhi dhe rrebeshe të dendura shiu ka përfshirë edhe Francën, duke shkaktuar probleme serioze dhe përmbytje në disa zona të vendit.
Situata më problematike paraqitet në Quimperlé dhe rajonin e Brittany, ku reshjet intensive kanë çuar në daljen nga shtrati të lumenjve, përmbytjen e rrugëve dhe evakuimin e banorëve. Niveli i ujit në lumin Laita ka tejkaluar 4.4 metra në qendër të qytetit më 21 janar, duke kapërcyer argjinaturat e kontrollit të përmbytjeve dhe duke detyruar autoritetet të ndërhyjnë menjëherë.
Uji ka vërshuar rrugëve të qytetit, duke mbuluar automjete dhe objekte të shumta.
Me ndihmën e zjarrfikësve, janë kryer evakuimet e para, ndërsa disa banorë janë detyruar të qëndrojnë në katet e sipërme të banesave, pasi rrugët janë shndërruar në lumenj dhe janë bërë të pakalueshme.
Dhjetëra automjete janë gjetur pjesërisht të zhytura në ujë, ndërsa shërbimet meteorologjike paralajmërojnë për reshje të reja shiu në zonë. Autoritetet lokale bëjnë me dije se niveli i ujit pritet të mbetet i lartë gjatë gjithë ditës, pa shenja përmirësimi të shpejtë.
Shërbimet e emergjencës janë mobilizuar në departamentet Finistère, Morbihan dhe Ille-et-Vilaine, të cilat janë vendosur në alarm portokalli për përmbytje. Sipas parashikimeve, reshjet e vazhdueshme dhe baticat e larta të pritura për datat 22 dhe 23 janar mund të ngadalësojnë rënien e niveleve të ujit.
Autoritetet u bëjnë thirrje qytetarëve të tregojnë kujdes maksimal dhe të ndjekin udhëzimet e shërbimeve të emergjencës.
